16 лютага, Мінск /Кар. БЕЛТА/. Надзвычайны і Паўнамоцны Пасол Пакістана ў Беларусі Саджад Хайдэр Хан у час сустрэчы са старшынёй Савета Рэспублікі Наталляй Качанавай адзначыў, што ў Пакістане з нецярпеннем чакаюць візіту Прэзідэнта Беларусі ў іх краіну, перадае карэспандэнт БЕЛТА.
"Перш за ўсё хацеў бы падзякаваць за прадастаўленую магчымасць сустрэцца сёння з вамі. І хацеў сказаць, што гэты візіт вельмі доўга адкладваўся: на працягу двух гадоў мы спрабавалі да вас даехаць, сёння гэта адбылося. Але на працягу гэтых гадоў я вельмі стараўся развіваць супрацоўніцтва паміж краінамі па ўсіх напрамках. Лідары абедзвюх краін мелі магчымасць сустракацца ў рамках саміту ШАС, а таксама саміту Нарады па ўзаемадзеянні і мерах даверу ў Азіі (НУМДА). У 2015 годзе я прымаў актыўны ўдзел у адкрыцці пасольства Пакістана ў Беларусі, у той час я быў з місіяй у Берліне, але прыехаў сюды, каб дапамагчы і вырашыць некаторыя пытанні, звязаныя з работай пасольства тут", - сказаў Саджад Хайдэр Хан.
Паводле яго слоў, за апошнія 7-8 гадоў прыкладзены вялікія намаганні, каб развіваць адносіны ва ўсіх напрамках паміж дзвюма краінамі. "На сённяшні дзень у нас існуюць сумесныя рабочыя групы, а таксама сумесная камісія, якія прымаюць актыўны ўдзел у развіцці адносін, - адзначыў пасол. - 80 пагадненняў, падпісаных паміж нашымі краінамі, з'яўляюцца трывалай базай для развіцця гэтых адносін у будучым. Прэм'ер-міністр Пакістана ў час сустрэчы з Прэзідэнтам Беларусі ў рамках саміту ШАС у Самаркандзе, а таксама ў рамках саміту НУМДА ў Астане дамовіліся, нягледзячы ні на што, развіваць адносіны сумеснымі намаганнямі".
"Галоўная і першарадная задача была - правядзенне сумеснай камісіі, якая адбылася ў студзені 2023 года. Цяпер мы працуем над арганізацыяй візіту міністра замежных спраў у Пакістан. Наступны крок - арганізацыя VIP-візітаў абедзвюх краін. Сёння мы атрымалі новае пісьмо ад прэм'ер-міністра Пакістана, адрасаванае Прэзідэнту Беларусі, дзе гаворыцца, што мы з нецярпеннем чакаем яго візіту ў нашу краіну", - дадаў Саджад Хайдэр Хан.
"У час правядзення сумеснай камісіі ў мінулым месяцы мы гаварылі аб усіх цяжкасцях, з якімі сутыкнуліся нашы адносіны, - удакладніў пасол. - Абодва бакі інтэнсіўна працуюць над вырашэннем гэтых праблем. На жаль, у мінулым годзе лічбы экспарту самага папулярнага беларускага тавару - трактароў, якія экспартаваліся ў Пакістан, - зменшыліся. Я асабіста пагаварыў з імпарцёрам з Пакістана і задаў яму пытанне: чаму вы перасталі купляць прадукцыю? Яго адказ быў звязаны з тым, што няма неабходных страховак, а таксама ёсць праблемы, звязаныя з лагістыкай, таму што кошт іх увозу вельмі ўзрос. Кошт трактара, які трэба пераправіць у Пакістан, напрыклад праз Афганістан або якім-небудзь любым іншым наземным спосабам, за адну адзінку ўзрастае на $4 тыс. Тым не менш мы ведаем, што абодва бакі працуюць над вырашэннем і гэтых праблем".
Саджад Хайдэр Хан дадаў, што ўзаемаадносіны паміж парламентарыямі і ўзаемныя візіты вельмі важны. "Наколькі я ведаю, апошні афіцыйны візіт і абмены паміж парламентарыямі адбыліся ў 2017 годзе. На жаль, з таго часу не было ніякіх афіцыйных візітаў паміж парламентарыямі абедзвюх краін, не было ніякіх дэлегацый. Мы былі вельмі блізкія да таго, каб арганізаваць візіт старшыні парламента ў жніўні 2021 года. Аднак па некаторых прычынах гэты візіт не адбыўся. Але мы ведаем, што Нацыянальная асамблея Пакістана гатова зноў адправіць спікера, адзінае, што патрэбна, - запрашэнне на імя новага старшыні. Адносна вашага візіту ў Пакістан у бліжэйшым будучым, мы атрымалі новае запрашэнне са змененымі датамі. Мы асабіста хочам вам перадаць гэта запрашэнне. У бягучым годзе мы будзем адзначаць 50-гадовы юбілей стварэння парламента і з нецярпеннем будзем чакаць вашага візіту ў Пакістан", - адзначыў ён.-0-
